Ang Butas 2 sa Bagsik ng MTRCB

Rufert John Lirio, Mocha Uson, and Ace Castro

Tuloy na tuloy na! Wala ng makakapigil pa sa Premiere Night ng pelikulang "Butas 2" ni Direk Bong Ramos sa UP Film Institute bukas (Sabado, ika-9 ng Hunyo, 2012) sa ganap na ika-7 ng gabi.

Ito ay sa kabila ng mga pagsubok at balakid na naranasan ng 21st Century mula sa post-production hanggang sa mahigpit na pagpapatupad ng batas ng MTRCB sa pamamagitan ng Legal Affairs Office nito.

Ang Legal Affairs Office ng naturang ahensiya ay kagyat na nagbanta kahapon, ika-7 ng Hunyo, ng pagsasampa ng kaso laban sa 21st Century at sa Unibersidad ng Pilipinas kung hindi isasailalim ang naturang pelikula sa pagsusuri ng Board.

Sa kabilang banda, nanindigan ang 21st Century na itutuloy nito ang pagpapalabas sa naturang pelikula dahil ito ay naianunsiyo na sa publiko.

Totoo kaya ang mga haka-haka na lubhang maalab ang mga eksena sa pelikulang ito kung kaya't ganoon na lamang kahigpit ang MTRCB dito?

Malalaman natin ang kasagutan sa katanungang iyan bukas sa pagsilip natin sa pelikulang Butas 2.